रुपन्देही- रुपन्देहीमा भएका छुट्टाछुट्टै दुर्घटनामा दुई जनाको ज्यान गएको छ। दुर्घटनामा दुई जना घाइते भएका छन्।
पूर्व-पश्चिम राजमार्गअन्तर्गत रुपन्देहीको देवदह नगरपालिका भलुहीमा बिहीबार बेलुका लु२ख ३५७३ नम्बरको टिपरले लु५८प ३९६५ नम्बरको मोटरसाइकलाई ठक्कर दिँदा नवलपरासी सुनवल-४ की ३४ वर्षीया शान्ति भण्डारीको मृत्यु भएको प्रहरीले जनाएको छ।
उनका श्रीमान र तीन वर्षीय छोरा घाइते छन्। घाइते दुवै जनाको देवदह मेडिकल कलेजमा उपचार भइरहेको छ।
यस्तै तिलोत्तमा नगरपालिका वडा नम्बर १५ पत्थरडाँडामा गएराति मोटरसाइकलबाट खसेर २३ वर्षीय जितबहादुर थापाको ज्यान गएको
छ्। मोटरसाइकलका चालक फरार छन्। मोटरसाइकलको नम्बरसमेत खुल्न नसकेको प्रहरीले जनाएको छ।