बुधबार, जेष्ठ ११, २०७९ | Wednesday 25th May 2022
जोडिनुहोस
Trending
  • गृहपृष्‍ठ
  • समाचार
  • दलित पत्रकारहरुको अवस्था र चुनौती विषयक अन्तरक्रिया कार्यक्रम सोमबार राजधानीमा सम्पन्न भएको छ
समाचार

दलित पत्रकारहरुको अवस्था र चुनौती विषयक अन्तरक्रिया कार्यक्रम सोमबार राजधानीमा सम्पन्न भएको छ

  • सिधा दृष्टी सोमवार, मंसिर ६, २०७८ | November 22, 2021

काठमाडौं -दलित पत्रकारहरुको अवस्था र चुनौती विषयक अन्तरक्रिया कार्यक्रम सोमबार राजधानीमा सम्पन्न भएको छ । नेपाल पत्रकार महासंघ, केन्द्रीय दलित विभागको आयोजनामा उक्त कार्यक्रम सम्पन्न भएको हो । अन्तरक्रिया कार्यक्रममा काठमाडौं उपत्यकामा रहेर विभिन्न सञ्चारमा माध्यममा आबद्ध झण्डै ३ दर्जन दलित पत्रकारहरुको सहभागिता थियो ।
कार्यक्रममा दलित पत्रकारहरूले मिडियामा भोगेका समस्या र अनुभवहरू सुनाएका थिए । यस्तै कार्यक्रममा राष्ट्रिय दलित आयोगका अध्यक्ष देवराज

विश्वकर्माले दलित समुदाय लामो समयदेखि उत्पीडनमा रहेको भन्दै त्यसको मुक्तिका लागि अक्षरमार्फत अघि बढ्न पत्रकारहरूलाई आग्रह गरे ।

उनले दलित वर्गको उत्थानका लागि सामर्थ्यको संघर्ष आवश्यक रहेको भन्दै त्यसमा पत्रकारहरूको महत्त्वपूर्ण भूमिका रहने बताए । प्रतिनिधि सभा सदस्य अन्जना विशंखेले दलित पत्रकारका समस्या समाधानका लागि सबै पत्रकारहरू एकजुट भएर अघि बढ्न आग्रह गरे । उनले कुनै पनि विषयलाई उठान गरेर मात्रै समस्याको समाधान हुन नसक्ने भन्दै पत्रकारिता मार्फत निरन्तरता दिन पत्र कारहरूलाई आग्रह गरे ।
नेपाल पत्रकार महासंघका वरिष्ठ उपाध्यक्ष रमेश विष्टले दलित पत्रकारको समस्या पहिचान गर्दै त्यसको समाधानका लागि महासंघ तयार रहेको बताए । उनले दलित पत्रकारको क्षमता अभिवृद्धि गर्न महासंघ तत्पर रहेको भन्दै त्यसका लागि सम्बन्धित संघ संस्थासँग सहकार्य गर्दै अघि बढ्ने बताए ।
महासंघका कोषाध्यक्ष कलेन्द्र सेजुवालले दलित पत्रकारको समस्या पहिचान गरी समस्या समाधान गर्न सम्बन्धित संघ संस्थासंगको अन्तरक्रियामार्फत अघि बढ्ने बताए । नेपाल पत्रकार महासंघका पूर्व केन्द्रीय सदस्य प्रकाशचन्द्र परियारले सञ्चार गृहमा दलित पत्रकारको समानुपातिक सहभागिता हुनुपर्ने धारणा राखे ।
पत्रकार बाबुराम विश्वकर्माले दलितमाथि हुने गरेको विभेद र हिंसाका घटनालाई राज्यले गम्भीर मुद्दाका रूपमा नलिने गरेको बताए । उनले दलितमाथि समुदायका सबै क्षत्रमा विभेद कायम रहेको भन्दै त्यसको अन्त्य हुनुपर्ने धारणा राखे ।
अभियन्ता जेबी विश्वकर्माले दलित पत्रकार भएकै कारण सञ्चार गृहमा समेत विभेद कायम रहेको बताए । राष्ट्रिय दलित पत्रकार संघका महासचिव लक्ष्मण दर्नालले सञ्चारको क्षेत्रमा इतिहासमा कुटवाल प्रथादेखि हालसम्म दलितहरूको महत्त्वपूर्ण भूमिका हुँदा पनि त्यसको कदर हुन नसकेको बताए ।
क्रियाशील दलित पत्रकार संघका पवित्रा सुनारले दलित भएकै कारण कार्यक्षेत्र समेत पत्रकारहरूले जातीय विभेद सहनु परेको भन्दै त्यसको अन्त्य हुनुपर्ने धारणा राखिन् । नेपाल पत्रकार महासंघका केन्द्रीय सदस्य प्रकाश धौलाकोटीले दलित पत्रकारको समस्या पहिचान गरी समाधानका बारेमा कार्यक्रमको आयोजना गरिएको बताए ।
कार्यक्रममा दलित समुदायका पत्रकारहरूको अधिकारको क्षेत्रमा काम गर्ने संघसस्थाका प्रमुख तथा प्रतिनिधिहरू र दलित समुदायका सक्रिय पत्रकारहरूको सहभागिता रहेको थियो ।

फेसबुक प्रतिक्रियाहरु

लोकप्रिय